У мінулую пятніцу ў раённым Цэнтры культуры прайшоў традыцыйны раённы злёт перадавікоў народнай гаспадаркі. Ва ўтульнай зале ў святочнай атмасферы адбылося ўшанаванне лепшых работнікаў і спецыялістаў розных галін вытворчай і сацыяльна—культурнай сфер.
Радасць працоўных перамог прыехалі падзяліць з бялынічанамі ганаровыя госці злёту: дэлегацыі Магілёўскага, Круглянскага, Шклоўскага раёнаў, галоўны спецыяліст па сацыяльна-эканамічных пытаннях рэспубліканскага камітэта прафсаюза работнікаў АПК Віталь ЛІСІЦКІ.
Удзельнікі злёту з цікавасцю паглядзелі відэафільм пра дасягненні працаўнікоў Бялыніччыны. Потым старшыня райвыканкама Мікалай КАДАЦЕНКА цёпла павіншаваў прысутных са святам, падвёў вынікі сацыяльна-эканамічнага развіцця раёна за мінулы год і пазнаёміў з планамі на сёлета.
Пачалася цырымонія ўшанавання перадавікоў народнай гаспадаркі з узнагароджання прэміяй райвыканкама “Чалавек года” і спецыяльнай прэміяй імя В.К. Бялыніцкага-Бірулі. Ганаровае званне “Чалавек года” прысвоена ляснічаму Цяхцінскага доследна-вытворчага лясніцтва Леаніду НІКАНОВІЧУ, выкладчыку па класе цымбалаў раённай дзіцячай школы мастацтваў Таццяне ЛОСЕВАЙ і загадчыку клініка-дыягнастычнай лабараторыі ЦРБ Аксане СКУБІЛАВАЙ.
У дадатак лясгас быў адзначаны за стан ідэалагічнай работы, а таксама за ахову працы.
Акрамя гэтага, ганаровай граматы і грашовай прэміі абласной арганізацыі Беларускага прафсаюза работнікаў лесу ўдастоены майстар лясгаса Юрый ЛЫСКО.
