У гарадскім парку Ліпавы гай сабралася больш за два дзясяткі каманд грамадзянскай абароны арганізацый, прадпрыемстваў, устаноў і гаспадарак раёна, каб прадэманстраваць вывучанасць, падрыхтаванасць да ліквідацыі наступстваў тых ці іншых надзвычайных сітуацый, якія, на вялікі жаль, усё ж такі здараюцца ў нашым паўсядзённым жыцці. Завіталі сюды, каб прыемна і з пазнавальнай карысцю правесці колькі гадзін вольнага часу, і многія жыхары райцэнтра.
Сандружына Бялыницкага лясгаса
Распачалося штогадовае маштабнае мерапрыемства раёна з традыцыйнага агульнага пастраення каманд. Затым супрацоўнікі РАНС прадэманстравалі свой прафесіяналізм і тэхналагічнасць па выратаванні вадзіцеля легкавога аўтамабіля і папярэджанні ўзгарання бензавоза, які ў нешчаслівую мінуту аказаўся побач з гэтым ДТЗ. Канечне, захапіў усіх прысутных і паказ спуску па тросах з 25-метровай вышкі двух выратавальнікаў РАНСу.
Адкрыў спаборніцтвы конкурс урачыстага прахаджэння дружын строем і з песняй. Асабіста адзначу каманду аддзела ідэалагічнай работы, культуры і па справах моладзі райвыканкама, якая бадзёра крочыла па стадыёнаўскім пляцы пад беларускамоўную песню.
Потым каманды прадпрыемстваў, гаспадарак, арганізацый і ўстаноў падзяліліся, і кожная з іх груп прыступіла да выканання сваіх спецыялізаваных заданняў.
Добраахвотныя пажарна-выратавальныя звенні змагаліся за права называцца лепшымі на гарадскім стадыёне: яны сапернічалі ў пажарнай эстафеце, перацягванні каната.
Пажарна-выратавальнае звяно Бялыницкага лясгаса
У праграме спаборніцтва санітарных дружын былі конкурсы на лепшы плакат супраць курэння, мастацкай самадзейнасці, аказання першай медыцынскай дапамогі параненаму, па эвакуацыі пацярпелых з зоны радыяцыйнага паражэння, адказаў на тэарэтычныя заданні…
Завяршыўся Дзень грамадзянскай абароны ўрачыстай цырымоніяй узнагароджання пераможцаў.
Лепшым сярод добраахвотных пажарных дружын стала дружная каманда СВК “Калгас “Радзіма”, сярод механізаваных выратавальных звенняў перамогу заваявала звяно БУКП “Жылкамгас”. Пераможцам стала і санітарная дружына ПМК № 241.
Суддзі спаборніцтваў таксама вызначылі лепшых выратавальніка і сандружынніцу, якімі, адпаведна, прызнаны прадстаўнік ПМК № 241 Дзмітрый БАКУНОВІЧ і Надзея ДРАЧОВА з дружыны Дома-інтэрната для састарэлых і інвалідаў.
Правядзенне Дня грамадзянскай абароны садзейнічае павышэнню гатоўнасці органаў кіравання, як і саміх грамадзянскіх фарміраванняў, да кваліфікаванай абароны насельніцтва, аб’ектаў і тэрыторый раёна падчас экстрэмальных сітуацый. А гэта ў сённяшні час, з яго пагрозамі і выклікамі, з’яўляецца надзвычай актуальнай задачай.
(c) Зара над Друццю
